Stummadurioù diwar-benn ar GSD hag al liested sevenadurel a vez aozet gant Bretagne Culture Diversité evit an dud a-vicher, an dilennidi, ar strollegezhioù hag ar c’hevredigezhioù a fell dezhe bezañ ambrouget evit kas o raktres da benn. Kensavet e vez ar stummadurioù-se evit bastañ gwellañ ma c’haller ouzh ezhommoù pep hini.
Temoù a bep seurt a c’hall bezañ staget gante :
- Tostaat ouzh ar GSD pe ouzh al liested sevenadurel gant ur sell teorikel ha pleustrek ;
- Tañva an doareoù renabliñ a gemerer perzh enne ;
- Un ambroug pleustrek war an doareoù d’ober enklask etnografek (emwelioù, dastum…).
Titouroù
Nikolas Amaury
namaury@bcd.bzh / 02.30.17.08.36
Un nebeud skouerioù deus stummadurioù bet graet
Stummadur war an dastum
En 2021 eo deuet e darempred kumun Brieg ha Kreizenn sevenadurel Arthémuse gant Bretagne Culture Diversité evit aozañ ur raktres dastum diwar-benn bed al labour-douar er gumun. Ouzhpenn ul labour ambroug eo bet aozet ivez un devezh stummadur evit ma vefe en-o-bleud tud a-youl vat ar raktres gant an teknikoù dastum. Palioù an devezh a oa deskiñ ur vetodologiezh ha mestroniañ binviji pleustrek evit gellout kas un enklask dastum war an dachenn da benn vat.
Meneget eo er c’heleier :
- “Lañset eo pazenn gentañ an dastum war ar vuhez en ti-feurm”, Ouest-France, 30 a viz Meurzh 2022.
- “E Brieg, krouiñ eskemmoù etre ar rummadoù diwar-benn ar vuhez en ti-feurm giz gwechall hag a-vremañ”, Le Télégramme, 01 a viz Ebrel 2022.
Stummadur war al liested sevenadurel
En 2022 eo deuet e darempred skipailh magouri liesdegemer Lannarstêr gant Bretagne Culture Diversité evit ma vefent ambrouget e-stern en ur raktres liammet ouzh al liested sevenadurel. Pemp den a-vicher warn-ugent deus bed ar vugaligoù o deus prederiet diwar-benn meizad an identelezh sevenadurel hag an doujañs ouzh ar sevenadurioù disheñvel e kenarroud o labour pemdeziek. Prederiet o deus a-stroll diwar-benn ar meizadoù pouezus-se en atalieroù c’hoarius a bep seurt.
